មូស្គូ៖ ក្រសួងការពារជាតិរុស្ស៊ី ថាទាហានរុស្ស៊ីបានបាញ់ទម្លាក់យន្តហោះដឹកជញ្ជូនសម្ភារៈផ្គត់ផ្គង់យោធាដែលផ្តល់ដោយដោយប្រទេសលោកខាងលិចទៅអ៊ុយក្រែន នៅជិតទីក្រុង Odessa ។

ការបាញ់ទម្លាក់នេះធ្វើឡើងកាលពីថ្ងៃសៅរ៍ ចុងសប្ដាហ៍មុន។

អ្នកនាំពាក្យក្រសួងការពារជាតិរុស្ស៊ី លោក Igor Konashenkov បានប្រាប់សារព័ត៌មានថា៖ «កងទ័ពអាកាសរុស្ស៊ីបានបាញ់ទម្លាក់យន្តហោះដឹកជញ្ជូនយោធាអ៊ុយក្រែននៅជិត Odessa ។ យន្តហោះនេះត្រូវបានប្រើដើម្បីដឹកជញ្ជូនសព្វាវុធជាច្រើនដែលផ្គត់ផ្គង់ដោយប្រទេសលោកខាងលិចទៅកាន់អ៊ុយក្រែន»។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយកាលពីថ្ងៃសុក្រថា ក្រសួងការបរទេសរុស្ស៊ីបានផ្ញើកំណត់ទូតទៅកាន់ប្រទេសទាំងអស់ រួមទាំងសហរដ្ឋអាមេរិកផងដែរ ទាក់ទងនឹងការផ្តល់អាវុធដល់អ៊ុយក្រែន។

នៅព្រឹកថ្ងៃព្រហស្បតិ៍ កាសែត Washington Post បានរាយការណ៍ថា រុស្ស៊ីបានផ្ញើកំណត់ទូតផ្លូវការមួយទៅកាន់រដ្ឋាភិបាលសហរដ្ឋអាមេរិកនៅដើមសប្តាហ៍នេះ ហើយបានព្រមានអំពី «ផលវិបាកដែលមិនអាចទាយទុកជាមុនបាន» ប្រសិនបើសហរដ្ឋអាមេរិក និងណាតូបន្តបញ្ជូនអាវុធទៅកាន់អ៊ុយក្រែន។

យោងតាមរបាយការណ៍របស់ CNN ដែលដកស្រង់សម្តីមន្ត្រីសេតវិមានកាលពីថ្ងៃសៅរ៍ កញ្ចប់ជំនួយយោធាចុងក្រោយរបស់សហរដ្ឋអាមេរិកសម្រាប់អ៊ុយក្រែនដែលមានតម្លៃ ៨០០លានដុល្លារ «បានចាប់ផ្តើមមកដល់» នៅក្នុងប្រទេសអ៊ុយក្រែន រួមទាំងឧទ្ធម្ភាគចក្រយោធា យន្តហោះបាញ់បង្ហោះ និងយន្តហោះគ្មានមនុស្សបើក (ត្រូន)។ ការដឹកជញ្ជូនចុងក្រោយនេះបាននាំឱ្យចំនួនជំនួយយោធាសរុបរបស់អាមេរិកដល់អ៊ុយក្រែនរហូតដល់ជាងបីពាន់លានដុល្លារ៕